Mga Katanungan na Madalas Itanong sa Buwan ng Ramadan

Mahalagang malaman ng bawat nag-aayuno ang layunin kung bakit ipinag-utos ang Sawm o pag-aayuno sa Ramadan, sapagkat may kasabihan na ang pagtukoy sa layunin ay katumbas ito ng kalahating bahagi ng labanan.

Malinaw sa Qur’an ang layunin kung bakit isinatungkulin sa atin ang pag-aayuno.

﴿یَـٰۤأَیُّهَا ٱلَّذِینَ ءَامَنُوا۟ كُتِبَ عَلَیۡكُمُ ٱلصِّیَامُ كَمَا كُتِبَ عَلَى ٱلَّذِینَ مِن قَبۡلِكُمۡ لَعَلَّكُمۡ تَتَّقُونَ﴾ [البقرة ١٨٣]

Ibig sabihin; (O kayong mga naniwala sa Allah! Ang pag-aayuno ay ipinag-utos Niya sa inyo, na tulad ng Kanyang pagkakautos sa mga nauna sa inyo, nang sa gayon ay magkaroon kayo ng Taqwa (Takot sa Allah o harang sa pagitan ninyo at ng pagkakasala).

Dahil dito; nakapalaki ng pagkakaiba ng taong pinipigilan niya ang kanyang sarili mula sa pagkain at pag-inum, at hinihintay lamang niya kung kailan lulubog ang araw, kumpara sa isang tao na nagtitiis mula sa lahat ng bagay para maabot niya ang dakilang hangarin sa pag-aayuno (Ang Taqwa).

Sahoor: ito ay ang pagkain at pag-inom sa oras ng madaling-araw nang may layunin na mag-ayuno. Sinabi ng Sugo ﷺ : “Kumain ng Sahoor, sapagkat sa pagkain ng Sahoor ay may pagpapala” Iniulat ni Al Bukhary at Muslim.

– ito ay pagtatagubilin ng pagkain ng Sahoor mula sa Sugo ﷺ kaya ito ay itinuturing na Sunnah Mu’akkadah (gawaing hindi iniiwan ng Sugo ﷺ) dahil sa maraming salaysay hinggil dito at ito ay paraan rin ng pagsalangsang sa pamamaraan ng pag-aayuno ng Ahlul Kitab (Hudyo at Kristiyano) sapagkat sila ay hindi nagsa-Sahoor.

Oras ng Sahoor: nagsisimula ang oras ng pagkain nito mula sa pinakahuling bahagi ng gabi hanggang sa malapit-lapit na Oras ng Fajr (bukang-liwayway). Subalit ang pinakamainam na oras nito ay pagpapaliban hanggang sa pinakamalapit sa Adhan ng Fajr.

Pinakamaliit na pang-Sahoor: pinahihintulutan na kumain ng marami o kaunting pagkain bago mag-ayuno, subalit ang pinaka-kaunting dami nito ay kahit isang tamr (datiles) lamang o isang lagok ng tubig (kung wala na halos natitirang oras na kumain).

Biyaya ng Sahoor:

1. Biyayang Pang-relihiyon: ang pagkain ng Sahoor ay pagtulad at pagmamahal sa paraan ng Sugo ﷺ na nagbibigay naman sa atin ng pagpapala ni Allah. Gayundin, ang mga Ahlul Kitaab ay hindi nagsa-Sahoor kapag sila ay nag-aayuno, kaya ang pagsa-Sahoor ay paglayo sa kanilang pamamaraan.

2. Biayayang Pangkalusugan: ito ay nagbibigay ng lakas at katatagan para sa katawan upang mabata ang hirap at gutom ng pag-aayuno. Nakadaragdag rin ito ng lakas upang magawa ang mga obligasyon at Gawain sa kabila nang kalagayan ng pag-aayuno. Ang mga dalubhasa ay nagtatagubilin rin na kumain ng Sahoor. Kanilang ipinapayo na kumain ng matamis gaya ng tamr dahil mataas ito sa glucose na kakailanganin ng katawan habang nag-aayuno.

Iftaar: ito ay ang pagkain at pag-inom bilang pagtatapos ng pag-aayuno sa paglubog ng araw at pagsapit ng takip-silim. Ito ay sunnah na nararapat maisagawa kaagad kapag nasiguro na ang paglubog ng araw. Sinabi ng Sugo ﷺ : “Patuloy na mananatiling nasa kabutihan ang Sangkatuhan hanggat sila ay nagmamadali sa pagkain ng Iftaar.” Iniulat ni Al Bukhary.

– ito ay kaagad na isinasagawa upang makabawing-muli ang katawan sa gutom, uhaw, at hirap ng pag-aayuno. Ang maaga at maagap na pag-iIftar rin ay kaaya-aya sapagkat ang mga Ahlul Kitaab ay hindi kaagad kumakain pagkatapos mag-ayuno hanggat sa makita nila ang mga bituin (sa gabi).

Pinakamainam na Iftaar: ang pinakamainam na Iftaar ayon sa Hadith mula sa Sugo ﷺ ay ang rutab (manibalang na datiles). Kung wala naman nito ay sapat na ang tamr (hinog o tuyong datiles). At kung wala pa rin ay sapat na ang tubig bilang pang-Iftaar.

Panalangin bago ang Iftaar: itinatagubilin sa isang nag-aayuno na manalangin ng marami at amgsumamo bago sumapit ang pagkain ng Iftaar. Ayon sa isang hadith ng Sugo ﷺ kabilang ang panalangin ng isang nag-aayuno hanggang sa siya ay mag-Iftaar sa mga panalanging hindi tinatanggihan. (Iniulat ni Tirmidhy at Ibnu Majah). Mainam na bigkasin ang dua sa Iftaar: “dhahaba zama’u wabtalitil urooq wa thabatal ajru inshallah” na nangangahulugan “napawi na ang uhaw, nabasa na ang ugat, at natiyak na ang biyaya sa Kapahintulutan ni Allah” (Iniulat ni Abu Dawud).

Isinulat ni: Shaykh Rasheed Vallena III, NMA-PH Online Islamic Teacher

#NewMuslimPH l www.NewMuslimAcademy.ph

#Ramadan1440